དེ་ཡང་སྟོན་པ་ཡང་དག་པར་རྫོགས་པའི་སངས་རྒྱས་ཀྱི་ཐུགས་རྗེའི་འོད་ཟེར་ལ་བརྟེན་ནས་འཛམ་གླིང་ཡངས་པའི་རྒྱལ་ཁམས་འདིར། སྐྱེས་བུ་དམ་པ་བསམ་གྱིས་མི་ཁྱབ་པ་བྱོན་མོད་ཀྱང༌། རྒྱ་བོད་ལ་སོགས་པ་འཛམ་གླིང་ལྷོ་ཕྱོགས་ཀྱི་དུམ་བུ་འདིར། ངེས་པའི་དོན་གྱི་གནད་མ་ལུས་ཤིང་ལུས་པ་མེད་པ་ཕྱིན་ཅི་མ་ལོག་ཅིང་མ་འཁྲུལ་པ་རྒྱ་ཆེར་གསུངས་བས༌། སྐལ་ལྡན་གྱི་སྐྱེ་བོ་གཞལ་དུ་མེད་པ་ཚིམ་པར་མཛད་པ་ནི། རྒྱལ་བ་ཉིད་ཀྱིས་རྔ་བོ་ཆེའི་མདོ་དང༌། ཨུ་དུམ་བ་རའི་མེ་ཏོག་ལྟར་དཀོན་པའི་མདོ་སྡེ་ལ་སོགས་པ། མདོ་སྡེ་དུ་མ་ཞིག་ནས་ལུང་བསྟན་པའི། ཀུན་མཁྱེན་ཆོས་ཀྱི་རྒྱལ་པོ་དུས་གསུམ་སངས་རྒྱས་དོལ་པོ་པ་ཤེས་རབ་རྒྱལ་མཚན་དཔལ་བཟང་པོ་ཞེས། ཕྱོགས་བཅུ་དུས་གསུམ་གྱི་རྒྱལ་པའི་ཞིང་ཁམས་ཐམས་ཅད་དུ་མཚན་སྙན་པའི་འབྲུག་སྒྲས་ཁྱབ་པ། མཁས་གྲུབ་ཀྱི་བསྟན་འཛིན་གཟའ་སྐར་བྱེ་བ་ཕྲག་བརྒྱའི་དབུས་ན་མཁྱེན་བརྩེ་ནུས་པའི་ཡེ་ཤེས་ཡོན་ཏན་འཕྲིན་ལས་འོད་སྟོང་བདག་པོའི་ཚུལ་གྱིས། གཞན་ཐམས་ཅད་ཟིལ་གྱིས་མནན་དེ་བཞུགས་པ་དེ་ཡིན་པ་གདའ། དེ་ཉིད་ཀྱི་ཡེ་ཤེས་ཆེན་པོའི་ཆོ་འཕྲུལ་ལས་སྤྲུལ་པ་ནི། རྔ་བོ་ཆེའི་ལེའུ་ཞེས་བྱ་བ། ངེས་དོན་མཐར་ཐུག་མ་སྦས་ཤིང་གསལ་བར་བསྟན་པའི་མདོ་སྡེ་ཆེན་པོ་དེ་ཉིད་ཀྱི་ཐ་མའི་ཚིག་གིས་ལུང་བསྟན་པ། འཛམ་གླིང་ལྷོ་ཕྱོགས་ཀྱི་རྒྱུད་འདིར་ཤིན་ཏུ་ཕྱི་མར་གྱུར་པའི་དུས་སུ་ཡང༌། ལི་ཙ་བཱི་གཞོན་ནུ་འཇིག་རྟེན་ཀུན་གྱིས་མཐོང་ན་དགའ་བ། དགེ་སློང་བློ་འཆང་སྟེ། ཤེས་རབ་རྒྱལ་མཚན་ཞེས་བྱ་བ་གྱུར་པ་དེ་ཉིད། སྔར་ཡང་ཤིན་ཏུ་ཕྱི་མར་གྱུར་དུས་དེར་བྱུང་ནས། ངའི་བསྟན་པ་གསལ་བར་བྱེད་དོ་ཞེས་འབྱུང་བའི་གནས་གང་དུ་བསྟན་པ་གསལ་བར་གྱུར་བའི་ཆོས་གཞི་གཙུག་ལག་ཁང་གི་གཙོ་བོ་ནི། རྟག་བརྟན་དམ་པའི་ཆོས་ཀྱི་གླིང་ངེས་དོན་དགའ་བའི་ཚལ་ཞེས་བྱ་བ་འདི་ཉིད་ཡིན་དེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐུགས་རྗེའི་བདག་ཉིད་ཅན་གྱི་བཀའ་ལས་ལུང་བསྟན་པ་ལགས། དེ་ཡང་རྔ་བོ་ཆེའི་མདོ་ལས། ཀུན་མཁྱེན་ཆོས་ཀྱི་རྒྱལ་པོ་དོལ་པོ་སངས་རྒྱས་དེ་ཉིད་ཀྱིས། རྒྱལ་བའི་བསྟན་པ་ཉི་མ་ལྟར་གསལ་བར་མཛད་ཅིང༌། ལོ་བརྒྱད་ཅུའི་བར་དུ་ངེས་དོན་གྱི་བསྟན་པ་ཕྱོགས་ཐམས་ཅད་དུ་དར་བར་འགྱུར་རོ།། དེ་ནས་བར་སྐབས་དེར་ཅུང་ཟད་ངེས་པའི་དོན་གྱི་བསྟན་པ་མི་གསལ་བར་གྱུར་པ་ན། སླར་ཡང་ཆོས་ཀྱི་རྒྱལ་པོ་དེ་ཉིད་འགྲོ་བའི་དོན་དུ་བཤེས་གཉེན་དམ་པའི་ཚུལ་བཟུང་ཏེ།  སྤྲུལ་བའི་སྐུའི་ངེས་པའི་དོན་གྱི་བསྟན་པ་གསལ་བར་མཛད་ཚུལ་ལུང་བསྟན་པ་ནི།  ཀྱེ་མ་འཇིག་རྟེན་ཀུན་མཐོང་དགའ། །བསྟན་པ་དགེ་སློང་གཟུགས་གྱུར་ནས། །རིང་ཞིག་བསྟན་པ་འབྱིན་བྱེད་ཅིང༌། །ཆོས་ཀྱི་རྔ་ཆེན་བསྡུང་བར་འགྱུར། །དེ་ན་མྱ་ངན་ཡོངས་འདས་ནས། །དེ་འོག་འཇིག་རྟེན་སྟོངས་པར་འགྱུར། །ཆོས་སྨྲ་དེ་ནི་དངས་(དངང)་གྱུར་ནས། །དེ་འདྲ་གཞན་ནི་འགའ་མི་འབྱུང༌། །དེ་འདྲའི་དགེ་སློང་རྙེད་དཀའ་སྟེ། །རིམ་གྱིས་སྣང་བ་ཉམས་པར་གྱུར། །འདི་ལྟར་དེ་ནི་ལྷོ་ཕྱོགས་སུ། །འབྱུང་བའི་ཐ་མ་གཅིག་ཡིན་ནོ།། དམ་པའི་ཆོས་དེ་ནུབ་པའི་དུས་སུ་སྔར་ཡང་ཆོས་སྨྲ་བ་དེ་འབྱུང་པར་འགྱུར་རོ།།  ཞེས་གསུངས་ཏེ། །འདིར་ལྷོ་ཕྱོགས་སུ་འབྱུང་བ་ཞེས་བཤད་པ་ནི། ཛམ་བུ་གླིང་གི་ཕྱེད་ལྷོ་མ་ཆུ་བོ་སི་ཏིའི་ལྷོ་ཕྱོགས་སུ་འབྱོན་པའི་དོན་ཡིན་ལ། དེ་ཡང་ཤིན་ཏུ་དུས་ཀྱི་ཐ་མར། དེ་ཉིད་འབྱོན་པར་གསུངས་པ་ནི། བདག་ཅག་གི་རྗེ་བཙུན་དམ་པ་འདིས། སླར་ཡང་ངེས་དོན་གྱི་བསྟན་པ་དར་བར་མཛད་པ་ལུང་བསྟན་པ་ཡིན་པར་གདའ། དེ་ལ་ཤིང་མོ་ཡོས་ཀྱི་ལོ། དབོ་ཟླ་བའི་ཚེས་བཅུ་གཅིག་གཟའ་ཚེས་སྦྱོར་བ་བྱེད་པ་ཐམས་ཅད་ཤིན་ཏུ་བཀྲ་ཤིས་པ་ལ་ས་ཆོག་མཛད། འཕགས་པ་སྤྱན་རས་གཟིགས་དང་སངས་རྒྱས་བྱང་སེམས་དཔག་ཏུ་མེད་པ་ནམ་མཁའ་ལ་བྱོན་པའི་ལྟས་དང༌། དཔལ་ཡེ་ཤེས་ཀྱི་མགོན་པོ་འཁོར་དང་བཅས་མངོན་སུམ་དུ་བྱོན་ནས། གནས་དེ་བདག་གིར་མཛད་པའི་བཀོད་པ་དང༌། ཕྱི་ལྟས་ཤིན་ཏུ་ངོ་མཚར་བ་མང་པོ་དང་བཅས་པ་བྱུང་ཞིང༌། དེ་རྗེས་ཀྱི་ནག་པ་ཟླ་བའི་ཚེས་བརྒྱད་ལ། གཙུག་ལག་ཁང་གི་རྨང་དང་པོར་བཏིང༌། ནམ་མཁའ་ལ་འཇའ་འོད་ཀྱི་བཀོད་པ་ངོ་མཚར་ཅན་དང༌། མེ་ཏོག་གི་ཆར་ཆེན་པོ་བསྙོན་མེད་དུ་མཐོང༌། དེ་སྔ་ས་ཕྱོགས་འདི་ཀུན་ན་གྲོག་མ་ལ་སོགས་པ་སྲོག་ཆགས་མང་ཡང༌། དེ་ཕྱིན་ཆད་ནས་སྲོག་ཆགས་ཆེས་དཀོན་ཞིང༌། གཙུག་ལག་ཁང་བཞེངས་པའི་ས་རྡོའི་བྱ་བ་བྱེད་པ་ཀུན་ལ་ཡང༌། སྲོག་ཆགས་རིགས་གཏན་ནས་མེད་པར་སོང༌། གནས་གཞི་དགོན་སྡེ་ཆེན་པོ་འདི་ཉིད་བཞེངས་པའི་དུས་སྐབས་ཐམས་ཅད་དུ། ལས་བྱེད་ཀྱི་སྐྱེ་བོ་ཐམས་ཅད་ཀྱང༌། གཞན་གྱིས་བསྐུལ་བ་ལ་མ་ལྟོས་པར་རབ་ཏུ་དགའ་ཞིང་སྤྲོ་བས་ལས་ལ་ངང་གིས་འཇུག་པ་དང༌། མཚན་མོའི་ཆ་ལ་སྐྱེ་བོ་ཐམསཅད་ཉལ་བའི་སྐབས་སུ་ཡང༌། ས་རྡོ་ཤིང་གསུམ་གྱི་ལས་ཀ་བྱེད་མཁན་མང་པོ་ཡོད་པ་འདྲ་བ་དང༌། ཕྱིས་བྲིས་འབུར་བརྡུང་གསུམ་གྱི་རྟེན་བཞེངས་པའི་སྐབས་སུ་ཡང༌། ནམ་གུང་ལས་དེ་དང་དེ་བྱེད་པ་པོ་མང་དུ་འཚོགས་པ་ལྟ་བུ་དང༌། སྒྲ་དི་རི་རི་ཡང་ནས་ཡང་དུ་འབྱུང་བ་དང༌། རྡོ་ལེབ་ཆེན་པོ་མི་མང་པོས་འདེགས་དགོས་པ་ཡང༌། མཚན་མོ་ཕན་ཚུན་ཐག་རིང་བར་བསྐྱལ་བ་དང༌། བསྣོར་ཏེ་འཇོག་པ་དང༌། ཆེས་ཆེར་ཤིན་ཏུ་ལྕི་བའི་ཁུར་ཆེན་པོ་དག ཁྱེའུ་བུ་མོ་ཆུང་ངུ་རེས་ཀྱང་ཐེག་པ་དང༌། དགོན་པ་དང་ཉེ་བར་ལུ་མ་བཀོད་མའི་ཆུ་མིག་ཆེན་པོ་སྔར་མེད་གསར་དུ་བརྡོལ་བ་སོགས། མིའི་འགྲོ་བ་སོ་སོ་སྐྱེ་བོའི་མཐོང་ཐོས་ཀྱི་སྤྱོད་ཡུལ་དུ་ཡང༌། སྡེ་བརྒྱད་དྲེགས་ཅན་རྣམས་དང༌། དཔའ་བོ་མཁའ་འགྲོའི་ཚོགས་གྱིས་འཕྲིན་ལས་ཀྱི་མཐུན་གྱུར་མཛད་པའི་རྟགས་བཤད་ཀྱིས་མི་ལང་བ་ཡོད་དེ་ཡེ་ཤེས་འཕགས་པའི་སྤྱོད་ཡུལ་ལ་བསམ་གྱིས་ག་ལ་ཁྱབ། གཙུག་ལག་ཁང་གི་ཞལ་བ་རྣམས་ནམ་དགོས་སུ་གཏེར་ནས་ཐོན་པ་ལྟ་བུ་ས་རྡོ་ཤིང་སོགས་དཀོན་པ་ལྟར་སྣང་བ་ཐམས་ཅད་ཀྱང་འབད་མེད་ལྷུན་གྲུབ་ཏུ་བྱུང་སྔར་གྱི་དེ་ཁའི་འཕྲོས་ལ། ཧོར་ཟླ་དྲུག་པ་ཆུ་སྟོད་ཀྱི་ཚེས་བཅུ་བཞིའི་ཉིན་པར། སྔ་དྲོའི་ཚ་བ་ཐོན་པ་ནས། ཉི་མ་ཕྱེད་ཡན་ལ་གཙུག་ལག་ཁང་ཆེན་མོའི་ཀ་བ་སུམ་ཅུ་སོ་དྲུག་པོ། མི་ཉུང་ངུས་དཀའ་ལས་མེད་པར་ཚུགས་པ་དང༌། འདིའི་ཐོག་གི་ཤིང་ཐམས་ཅད་ཀྱང་ཉི་མ་གཅིག་ལ་ཁེལ། དེ་སྐབས་དཔལ་མགོན་པོའི་འཁོར་རྣམས་དེ་འདྲའི་ལས་ལ་ཞུགས་པའི་ཚུལ་གསལ་བར་གཟིགས་པ་ཡིན་པ་ཡང་གདའ།

དེ་ལྟར་ན། སྒྲུབ་གནས་ཐམས་ཅད་ཀྱི་རྒྱལ་པོ། རི་ཁྲོད་ཆེན་པོ་དཔལ་ཇོ་མོ་ནང་གི་གནས་ཀྱི་སྒོ་ཆེན་པོར་གྱུར་བ་འདི་ཉིད་ལ་དང་པོར་ཕྱི་འབྱུང་བས་གྲུབ་པའི་དགེ་མཚན་གྱི་དབང་དུ་བྱས་ན།

བརྟན་ཅིང་བརྗིད་ལ་མཐོ་ཞིང་ལྷུན་ཆགས་པ། །

ལྷུན་པོ་བྱེ་བ་ཕྲག་བརྒྱའི་དཔལ་ཡོན་ཅན། །

ནགས་རྒྱལ་ཞེས་བྱ་རིའི་དབང་པོའི་འདབས། །

ས་སྲུང་བུ་ཡི་གདོང་གི་དབྱིབས་ཅན་ཡོད། །

རྒྱབ་རི་ནོར་བུའི་བྲག་ཚོགས་གཏམས་པ་ནི། །

ལྷ་མིན་གཡུལ་འཇོམས་ལྷ་ཚོགས་དབུགས་འབྱིན་མཛད། །

རྒྱལ་ཆེན་རྣམ་མང་ཐོས་པ་འགྱིང་པའི་སྐུ། །

སེང་གེའི་ཁྲི་ལ་བཞུགས་པའི་རྣམ་པ་ཅན། །

དེ་ཡི་མདུན་དུ་རིན་ཆེན་ཆར་འབབ་ཅིང༌། །

གཏེར་གྱི་བུམ་པ་འདྲ་བའི་རྟགས་མཚན་དང༌། །

མདུན་ནས་བལྟས་ན་གཡས་སུ་འཁྱིལ་བའི་དུང༌། །

རྒྱབ་བལྟས་བང་རིམ་དང་བཅས་མཆོད་རྟེན་དབྱིབས། །

རིན་ཆེན་རྡུལ་བརྩེགས་མཁའ་ལ་རྙོག་པ་འདྲ། །

དེ་དང་ཉེ་བའི་ངོས་ལ་དགེ་མཚན་ནི། །

དཔལ་གྱི་བེའུ་ལ་སོགས་བཀྲ་ཤིས་ཀྱི། །

རྟགས་བརྒྱད་པོ་རྣམས་ཡོངས་སུ་ཚང་བར་ཡོད། །

ས་གཞི་ཤར་དང་དབང་ལྡན་ཕྱོགས་སུ་གཞོལ། །

ནུབ་དང་ལྷོ་ཡི་ཕྱོགས་སུ་པགས་ཀྱིས་མཐོ། །

རྒྱུད་སྡེ་ཀུན་ལས་དཀྱིལ་འཁོར་བཞེངས་པ་ཡི། །

ས་གཞིའི་མཚན་ཉིད་མཆོག་ཏུ་བསྔགས་པ་ཡིན། །

བྱང་གི་ཕྱོགས་སུ་ལུ་ཧི་ཏར་གྲགས་པ། །

རིག་བྱེད་གཞུང་ལས་ཚངས་པའི་སྲས་སུ་བཤད། །

ཆུ་ཀླུང་ཀུན་གྱི་རྒྱལ་པོ་གྲགས་ལྡན་འབབ། །

འབབ་ཆུ་གཞན་ཡང་གཡས་སུ་འཁྱིལ་བས་འགྲོ། །

ཤར་ཕྱོགས་རི་འདི་བློན་པོ་རིན་ཆེན་འདྲ། །

ཉི་ཟླ་གཟའ་སྐར་ཐམས་ཅད་འཆར་བའི་གནས། །

ཤར་ལྷོའི་ཕྱོགས་ན་ནོར་བུ་རིན་ཆེན་བྲག །

རྣམ་མང་ཐོས་དང་ནོར་གཏེར་དུ་མས་གང༌། །

ལྷོ་ཕྱོགས་གྲུབ་པའི་གནས་ཆེན་ཀུན་གྱི་གཙོ། །

མཐའ་ཡས་དངོས་གྲུབ་བྱེ་བའི་གཏེར་ཆེན་བཞུགས། །

བདེན་བྲལ་ངོས་ལ་འཁོར་ལོ་རིན་པོ་ཆེ། །

ལྟེ་བ་བརྟན་ཅིང་རྩིབས་བརྒྱད་གསལ་བར་སྣང༌། །

ཆུ་བདག་ཕྱོགས་ཀྱི་རི་བོ་མགྱོགས་འགྲོའི་གཙོ། །

རྣམ་དཀར་དགེ་བའི་ལམ་དང་བཅས་ཏེ་ཡོད། །

ནུབ་བྱང་ཁྱིམ་བདག་རིན་ཆེན་གོ་མཚོན་བཅས། །

སྙིང་སྟོབས་སྲ་ཞིང་བརྟན་པ་དཔའ་བོའི་ཚུལ། །

བྱང་ཕྱོགས་ཤེས་རབ་མཚན་ལྡན་ནགས་ཀྱི་རི། །

བཙུན་མོ་དམ་པའི་རྣམ་པ་མཆོག་ཏུ་གསལ། །

དབང་ལྡན་མཚམས་ན་གླང་ཆེན་ལུས་རྒྱས་པ། །

འགྱིང་ཞིང་གུས་པས་ཚུར་ལ་འོངས་པའི་ཚུལ། །

མཁའ་ལ་འཁོར་ལོ་བཅུ་དྲུག་རྩིབས་ལྡན་དང༌། །

ས་གཞི་ལ་ཡང་པདྨ་རྒྱས་པའི་ཚུལ། །

གཡས་ཀྱི་རི་བོ་མཐོ་ཞིང་སྐྱོབ་འདྲ་དང༌། །

གཡོན་ཕྱོགས་དར་དཀར་ཡོལ་བ་བརྐྱངས་བ་བཞིན། །

རྒྱབ་རི་མཐོ་ཞིང་གཟེངས་མཐོ་ལྷུན་རེ་ཆགས། །

རྒྱ་ནག་རྩིས་ཀྱིས་དཔྱད་ནས་འབྱུང་བ་བཞིན། །

ཤར་གྱི་སྟག་དང་ལྷོའི་གཡུ་འབྲུག་དང༌། །

ནུབ་ཀྱི་བྱ་དང་བྱང་གི་རུས་སྦལ་སོགས། །

མདོར་ན་རྒྱལ་བའི་བཀའ་དང་འཇིག་རྟེན་གྱི། །

གཙུག་ལག་རྣམས་ལས་ཇི་སྐད་བཤད་པ་ཡི། །

ས་གཞིའི་དགེ་མཚན་ཇི་སྙེད་བཤད་པ་ཡི། །

ས་གཞིའི་དགེ་མཚན་ཇི་སྙེད་ཡོད་པ་རྣམས། །

ཐམས་ཅད་གནས་མཆོག་འདི་ལ་ཚང་བར་བཞུགས། །

གནས་མཆོག་དམ་པ་འདིར་ནས་སུ་འདུག་ཀྱང༌། །

ཆགས་ལྡང་ལ་སོགས་ཉོན་མོངས་ཤས་ཆུང་ཞིང༌། །

དགེ་བའི་ཆོས་རྣམས་གོང་ནས་གོང་དུ་འཕེལ། །

གཉིད་རྨུག་སེལ་ཞིང་རིག་པ་དངས་པའི་གནས། །

ཞེན་ཆགས་ཆུང་ཞིང་ངེས་འབྱུང་འཕེལ་བའི་གནས། །

གནོད་སེམས་ཞི་ཞིང་སྙིང་རྗེ་རྒྱས་པའི་གནས། །

རྣམ་གཡེངས་སངས་ཤིང་ཞི་གནས་བརྟན་པའི་གནས། །

ལོག་ལྟ་མི་འབྱུང་ལྷག་མཐོང་ངང་གིས་སྐྱེ། །

གནས་མཆོག་འདི་དང་མཚུངས་པ་གཞན་ཡོད་མིན། །

ཕྱོགས་འཛིན་ཀུན་གྱི་བསྔགས་པ་བརྗོད་པ་དང༌། །

ཐེ་རང་འགོང་པོས་གྲགས་པ་བསྒྲགས་པ་དང༌། །

དབང་སྡུད་ནོར་སྒྲུབ་ལ་སོགས་རྟེན་འབྲེལ་གྱི། །

འདུ་འཚོག་བྱུང་ཞིང་གྲགས་པ་ཙམ་ཞིག་ལ། །

རྨོངས་པའི་འགྲོ་རྣམས་ཆུ་ལྟར་རྒྱུག་བཞིན་དུ། །

ཞིང་མཆོག་ཡིན་པར་འཁྲུལ་དང་འདི་མི་མཉམ། །

གཞན་དུ་ལོ་དང་ཟླ་བར་བསྒོམས་པ་པས། །

གནས་མཆོག་འདིར་ནི་ཞག་དང་ཟ་མ་ཙམ། །

བསྒོམས་པའི་ཕན་ཡོན་ལྷག་པར་ཆེ་བ་ཡིན། །

གཞན་དུ་ཡུན་རིང་དགེ་སྦྱོར་འབད་པ་བས། །

སྡུག་པའི་ལས་སྤངས་ཆོས་དང་བླ་མ་ལ། །

མོས་གུས་བྱས་ནས་གནས་འདིར་ཉལ་བ་ཡང༌། །

བླ་མེད་བྱང་ཆུབ་མཆོག་ལ་ཤིན་ཏུ་ཉེ། །

ཉ་པ་གདོལ་པ་རི་དྭགས་དམན་པ་དང༌། །

མཚམས་མེད་བྱས་པ་ལ་སོགས་སྡིག་ཅན་ཡང༌། །

རང་ཉིད་དད་པའམ་གཞན་གྱིས་བསྐུལ་ཡང་རུང༌། །

གནས་འདི་བསྐོར་ཞིང་གཙུག་ལག་ཁང་ལ་ལྟ། །

ཁྲུས་བྱས་ཕྱག་དང་བསྐོར་བ་མཆོད་པ་འབུལ། །

དེ་ཡི་སྡིག་པ་དག་ནས་ལྷ་ཡུལ་སྐྱེ། །

སྐྱེ་བོ་གཞན་དག་སྨོས་ཀྱང་ཅི་ཞིག་དགོས། །

གནས་མཆོག་འདི་ནི་མཐོང་པ་དོན་ལྡན་ཡིན། །

ཨོཾ་སྭ་སྟི། འདིར་དུས་གསུམ་དུ་བྱོན་པའི་རྒྱལ་བ་ཐམས་ཅད་ཀྱི་ཞིང་ཁམས་ཀྱི་མཆོག་འོག་མིན་སྟུག་པོ་བཀོད་པ་དང་གཉིས་སུ་མ་མཆིས་པ། སངས་རྒྱས་དང་བྱང་ཆུབ་སེམས་དཔའ་འཕགས་ཚོགས་རྒྱ་མཚོ་འདུ་བའི་གནས་ཆེན་འཛམ་གླིང་བྱེ་བ་ཕྲག་བརྒྱའི་ཆོས་གཞི་མཐའ་དག་གི་གཙུག་གི་ནོར་བུ། ཏིང་འཛིན་འབུམ་ཕྲག་བརྒྱའི་འབྱུང་གནས། ལེགས་བཤད་བྱེ་བ་སྒྲོག་པའི་སྐྱེད་ཚལ། འགྲོ་ཀུན་ཐར་བར་བསྒྲོད་པའི་ཐེམ་སྐས། སྲིད་ཞིའི་ཕན་བདེ་ཀུན་གྱི་རྩ་བ། མཆོག་དང་ཐུན་མོང་གྲུབ་པའི་ཞིང་ས། ཀུན་ཁྱབ་འཕྲིན་ལས་འབར་བའི་ཉིན་བྱེད།  ཕྱོགས་བཅུ་དུས་གསུམ་རབ་འབྱམས་སྲིད་ཞི་མཐའ་དག་གི་རྣམ་དཀར་ལེགས་ཚོགས་ཐམས་ཅད་འབད་རྩོལ་མེད་པར་ལྷུན་གྲུབ་ངང་གིས་འདུ་བའི་གནས། རྟག་བརྟན་དམ་ཆོས་གླིང་ངེས་དོན་དགའ་བའི་ཚལ་གྱི་གཙུག་ལག་ཁང་འདིའི་ལོ་རྒྱུས་ཀྱི་དབང་དུ་བྱས་ན།

རྒྱལ་བ་ཀུན་ལས་ལྷག་པའི་ཐུགས་རྗེ་ཅན། །

མཉམ་མེད་ཤཱཀྱ་སེང་གེ་དུས་འཁོར་ལོ། །

གསང་བདག་འཇམ་དཔལ་ཕྱག་ན་པདྨ་སོགས།།

ས་བཅུའི་དབང་ཕྱུག་ཆོས་རྒྱལ་རིགས་ལྡན་ཚོགས། །

འཕགས་ཡུལ་གྲུབ་པའི་གཙུག་རྒྱན་དུས་འཁོར་ཞབས། །

བསྟན་པ་འདི་ལ་མཁས་དང་གྲུབ་པའི་དཔལ། །

བགྲང་བར་མི་དཔྱོད་ཡང་དག་ལམ་སྟོན་པ། །

ཀུན་གྱི་རྒྱན་གྱུར་འགྲན་པའི་ཟླ་བྲལ་བ། །

ཆོས་ཀྱི་རྒྱལ་པོ་ཤེས་རབ་རྒྱལ་མཚན་དཔལ། །

དོལ་པོ་བ་ཞེས་སྙན་པའི་འབྲུག་སྒྲ་ཡིས། །

ཕྱོགས་ཀྱི་འཁོར་ལོ་མ་ལུས་འགེངས་མཛད་པ། །

ཁྱོད་ནི་སངས་རྒྱས་ཀུན་གྱི་རང་བཞིན་ཏེ། །

སངས་རྒྱས་ཀུན་ཡང་ཁྱེད་ཀྱི་རྣམ་འཕྲུལ་ལགས། །

བྱང་ཆུབ་སེམས་དཔའ་ཀུན་ཀྱི་ཡབ་ཀྱང་ཁྱོད། །

ཉན་ཐོས་རང་རྒྱལ་འཕགས་ཚོགས་མ་ལུས་པའི། །

རྟེན་དང་མགོན་སྐྱབས་བླ་མ་ཁྱེད་གཅིག་བུ། །

དྲག་པོ་འཇུག་སེལ་དབྱིག་གི་སྙིང་པོ་སོགས། །

དྲེགས་ལྡན་ཀུན་ཀྱིས་མཆོད་བསྟོད་བཀུར་སྟིའི་ཡུལ། །

རྒྱལ་བ་ཁྱེད་ལས་གཞན་དུ་མ་མཆིས་ཏེ། །

འགྲོ་བ་དྲུག་ཏུ་འཁོར་བའི་སྐྱེ་བོའི་ཚོགས། །

ཀུན་གྱི་སྐྱོབ་པ་གཅིག་པོའང་རྒྱལ་བ་ཁྱོད། །

སྲིད་ཞིར་གཏོགས་པའི་སྐྱེ་བོ་ཐམས་ཅད་ལ། །

མཐའ་དག་ལེགས་ལམ་སྩལ་བ་བའང་ཁྱོད་ཉིད་ལགས། །

དེ་ལྟར་སྐྱབས་གནས་རྒྱ་མཚོ་དཀོན་མཆོག་གསུམ། །

ཀུན་འདུས་དུས་གསུམ་སངས་རྒྱས་ཇོ་ནང་པ། །

ཀུན་གྱི་བྱེད་པོ་འདྲེན་མཆོག་བླ་མེད་དེས། །

སྲིད་གསུམ་མཐའ་དག་སྐྱོང་བའི་དགེ་ལེགས་སྩོལ།།

གསུམ་པ།   སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མ་ཆད་ཅིང་དར་བའི་གཟི་བརྗིད་དཔལ་དང་ལྡན་པའི་ཡོན་ཏན་ནི།   ཁ་བ་ཅན་འདི་ན་སྔོན་སྒྲུབ་གནས་བསམ་གྱིས་མི་ཁྱབ་པ་བྱོན་ཞིང༌།   ད་ལྟར་ཡང་སྒྲུབ་གྲྭ་མང་དུ་ཡོད་མོད་ཀྱི། ། སྒྲུབ་གྲྭ་འདི་དང་པོར་ཚུགས་པ་དང་དུས་མཉམ་པའི་སྒྲུབ་གྲྭ་བཤད་གྲྭ་རྣམས་སྨོས་ཀྱང་ཅི་དགོས།    འདི་དག་ལས་ཆེས་འཕྱི་བ་དུས་ཕྱིས་བཏབ་པ་རྣམས་ཀྱང༌།   འགའ་ཞིག་ནི་རྩ་བ་ནས་སྟོངས།    འགའ་ཞིག་ནི་གྲོང་ཡུལ་དང་སེར་ཁྱིམ་དུ་སོང༌།   ཁ་ཅིག་སྔོན་གྱི་ཤུལ་དུ་ད་ལྟ་སྒྲུབ་གྲྭ་ཡོད་པ་འང་འདུག་མོད་ཀྱི།   བར་སྐབས་སུ་སྟོངས་པའི་ཤུལ་ལ་གསར་འདེབས་བྱས་པ་དང༌།   ཁ་ཅིག་སེར་ཁྱིམ་གྱི་ས་ནས་གཙང་མའི་གྲྭ་གསར་དུ་ཕྱེ་བ་དང༌།   བར་སྐབས་སུ་སེར་ཁྱིམ་དུ་སོང་བ་རྣམས་ཕུད་ནས།   དེའི་ཤུལ་དུ་གྲྭ་ཚང་ངམ་སྒྲུབ་གྲྭ་གསར་འཛུག་བྱས་པ་ཁོ་ན་ཡིན་གྱི།   ལོ་སུམ་བརྒྱ་བཞི་བརྒྱ་ཙམ་དུ་གང་སྟོངས་དང་སེར་ཁྱིམ་ལ་སོགས་པས་བར་མ་ཆོད་པར།   བླ་བརྒྱུད་ཆོས་བརྒྱུད་གཅིག་ཅིང༌།   ཉམས་ལེན་གྱི་རྒྱུན་གཅིག་པའི་སྒྲུབ་བརྒྱུད་བར་མ་ཆད་པར་དར་བ་ནི།  བོད་གངས་རིའི་ཁྲོད་ན་སྒྲུབ་གནས་དམ་པ་འདི་ཁོ་ན་ལས་གཞན་མེད། གནས་འདིར་ནི་མ་ཅིག་རི་མ་ནས་གཟུང་སྟེ།   དེང་སང་གི་བར་དུ་སྒྲུབ་གྲྭ་རྒྱུན་མ་ཆད་པའི་དབང་དུ་བྱས་ནས།   ལོ་ལྔ་བརྒྱ་ཙམ་སོང་ཞིང༌།   ཆོས་རྗེ་ཀུན་སྤངས་ཆེན་པོ་ཕེབས་པ་ནས་ཆོས་བརྒྱུད་གཅིག་ཅིང༌།   ཉམས་ལེན་གྱི་རྒྱུན་གཅིག་པའི་སྒྲུབ་བརྒྱུད་འདི་ཁོ་ན་ལ་འང༌།   ད་ལྟ་ཡན་ཆད་དུ་ལོ་བཞི་བརྒྱ་ལྷག་ཙམ་སོང་ངོ༌། ། དེ་ལྟར་ན་གནས་གཅིག་ཏུ་ཚུགས་པའི་སྒྲུབ་བརྒྱུད་ལ་དཔལ་ཇོ་མོ་ནང་དང༌།   གནས་གཅིག་ཏུ་ཚུགས་པའི་བཤད་གྲྭ་ལ་གསང་ནེའུ་ཐོག་བསྟན་པའི་རྒྱུན་གང་སྟོང་མེད་པར་གནས་ཡུན་རིང་བ་ཡིན།    ཤེས་ལྡན་བློ་གཟུ་བོར་གནས་པ་རྣམས་ལ་གྲགས་ཤིང་ཕྱོགས་གཅིག་ནས་དོན་ལ་འང་གནས་པ་ཡིན་མོད་ཀྱི།   འོན་ཀྱང་དཔལ་ལྡན་གསང་ཕུ་ན།   ཕྱིས་འབྱུང་ལོ་ཉིས་བརྒྱ་ཚུན་ལ།   ས་དགེ་སོ་སོའི་གྲུབ་མཐའ་འཛིན་པ་མ་གཏོགས།   རྔོག་ལོ་ཡབ་སྲས་དང༌།   ཕྱག་ཚང་ལ་སོགས་པ་གསང་ཕུ་བ་རང་ལུགས་ཀྱི་གརུབ་མཐའ་འཛིན་པ་མེད་ལ།   གནས་མཆོག་འདི་ནི་ལྟ་གྲུབ་ཉམས་ལེན་གྱི་རྒྱུན་གཅིག་ཁོ་ནས་བྱིན་བརླབས་ཀྱི་རྒྱུན་ལ་བསྲེ་བསླད་མེད་པ་དང༌།   གཞན་ཡང་ཚིག་བཤད་ཙམ་གྱི་རྒྱུན་མ་ཡིན་པར་སྒྲུབ་པ་ཉམས་ལེན་སྙིང་པོར་བྱེད་པའི་སྲོལ་ཀ་རྒྱུན་མ་ཆད་ཅིང༌།   དུས་ཀྱི་ཐ་མ་འདི་ལྟ་བུར་ཡང་ལག་ལེན་དུ་ཐེབས་པའི་གྲ་ཡིན་པས་ན།   །ཅིག་ཤོས་ལས་ཀྱང་ཆེས་ཁྱད་པར་དུ་འཕགས་ཤིང༌།   །ཆེས་ངོ་མཚར་རྨད་དུ་བྱུང་བ་ཡིན་ནོ།   །སྒྲུབ་གནས་ཀྱི་རྒྱལ་བོ་དཔལ་ལྡན་ཇོ་མོ་ནང་འདིར་མཐོང་གྲོལ་ཆེན་མོ་གནས་ཀྱི་ལྟེ་བར་བྱས་པའི་མཐའ་སྐོར་གྱི་སྒྲུབ་གནས་བྱིན་རླབས་ཅན་རྣམས་ཅུང་ཟད་སྨོས་ན།   རྒྱབ་རིའི་གཡོན་ཕྱོགས་ཉི་བསྟན་འདི་ལ།   ཆོས་རྗེ་ཡབ་སྲས་བཞིས་བཞུགས་ཤིང་རྡོ་རྗེ་ཕག་མོའི་གནས་སྐྱིད་ཕུག་བདེ་ལྡན་འོད་གསལ་བྲ།   དེའི་གཡས་ཕྱོགས་ན་རིན་པོ་ཆེ་ཤེས་རབ་འབུམ་པ་དང༌།   མཁས་མཆོག་ཉ་དབོན་ཆེན་པོ་ཀུན་དགའ་དཔལ།   རྒྱལ་སྲས་དངུལ་ཆུ་ཆོས་རྫོང་བའི་ཐུགས་སྲས་རྒྱ་མ་པ་ཡོན་ཏན་འོད་སོགས་སྐྱེས་བུ་དམ་པ་དུ་མས་བཞུགས་པའི་གནས་ཤུག་པ་གནམ་འཕྱད་བདེ་ཆེན་བྲག   དེའི་སྟོད་ན་མཁས་གྲུབ་ཨོ་རྒྱན་དཀོན་མཆོག་གྲགས་པའི་བཞུགས་གནས་སྒྲུབ་ཁང་འདི་ལགས།   སྤུང་བཀྲ་དབུ་རྒྱན་པ་ལས་ཅུང་ཟད་བགྲེས་པ་གཅིག་ཡིན།   ཨོ་རྒྱན་དུ་ལོ་ལྔ་བཞུགས།   གྲུབ་རྟགས་མངོན་གྱུར་བ་མངའ།   ཆོས་རྗེ་ཀུན་སྤངས་ཆེན་པོའི་མཆེད་གྲོགས་གོངམ་ལགས་པར་གདའ།   སྐྱིད་ཕུག་གི་གཡོན་ཕྱོགས་ཀྱི་བྲག་ན།   མ་ཅིག་རི་མའི་ཆོས་གྲྭ་དང་བཞུགས་གནས།   དེའི་གཡོན་ཕྱོགས་སུ་ཕུག་པ་ཆེན་པོ་གོང་འོག་གཉིས་ཡོད་པའི།   གོང་མ་ནི་སློབ་དཔོན་ཆེན་པོ་པདྨ་འབྱུང་གནས་ཀྱི་བཞུགས་གནས་དངོས་དེ་ཡིན་པར་གྲགས་ཤིང༌།   ཕྱིས་གྲུབ་ཐོབ་འདར་ཕྱར་རིན་ཆེན་བཟང་པོས་ཡུན་རིང་དུ་བཞུགས།   སློབ་དཔོན་པདྨ་འབྱུང་གནས་དང་མངོན་སུམ་དུ་མཇལ།   རྟ་མགྲིན་ཡང་གསང་གི་ཆོས་སྐོར་མཐའ་དག་གི་བཀའ་བབས་བརྙེས་པ་དེར་གདའ།   ཕུག་པ་འོག་མ་འདིར་གྲུབ་ཐོབའདར་ཕྱར་ཉིད་ཀྱིས་བདག་མེད་ལྷ་མོ་བཅོ་ལྔ་དང༌།   འཁོར་ལོ་སྡོམ་པ་ལྷན་སྐྱེས་སོགས་ཀྱི་ཞལ་གཟིགས་ས་དེར་གདའ།   ཕུག་པ་འདི་གཉིས་ཀར་དུ་གྲུབ་ཐོབ་དེས་ཡུན་རིང་དུ་བཞུགས་པའི་དེང་སང་འདར་ཕྱར་ཕུག་པ་གོང་འོག་ཏུ་གྲགས།   སྐྱིད་ཕུག་གི་འོག་ན་ཨཱཿཁས་བཙུན་ཡོན་ཏན་རྒྱ་མཚོ་དང༌།   ཀུན་མཁྱེན་ཆོས་ཀྱི་རྒྱལ་པོ་གཉིས་ཅར་གྱི་སློབ་མ་དགེ་སློང་བཀྲ་ཤིས་བཟང་པོ་ཞེས་བྱ་བ།   མངོན་ཤེས་ཐོགས་མེད་དུ་མངའ།    སྐུ་གཤེགས་དུས་བྱང་ཆུབ་ཀྱི་སེམས་སྤྱི་བོར་འཁྱིལ་བས་དབུ་གཙུག་ཏུ་གཙུག་ཏོར་གྱི་རྣམ་པ་ཤིན་ཏུ་རྒྱས་ཏེ་རྨོག་གི་ཁྱོན་ཙམ་བྱུང་བ།    དེ་ལྟ་བུའི་བཞུགས་གནས་ཕུག་པ་དག༌།   དེའི་འོག་ཕྱོགས་ན་ཀུན་མཁྱེན་ཆོས་ཀྱི་རྒྱལ་བོ་ཉིད་འཛིན་པའི་ཉམས་རྟོགས་མཐར་ཕྱིན་པའི་ཚུལ་བསྟན་པ་རྡོ་རྗེ་གདན་ཞེས་བྱ་བའི་ཕུག་པ་དང༌།   དྨ་གདན་ཞེས་བྱ་བའི་ཕུག་པ་གཉིས་ཡོད༌།   དེའི་འོག་གཡོན་ངོས་བྲག་པདྨ་ཁ་འབུས་ལྟ་བུའི་རྩེ་ལ།   ཆོས་རྗེ་ཀུན་སྤ་ངས་ཆེན་པོ་དང༌།   བྱང་སེམས་རིན་པོ་ཆེ་ཅུང་ཟད་བཞུགས་ཤིང༌།   མཁས་བཙུན་ཡོན་ཏན་རྒྱ་མཚོས་ཡུན་རིང་བཞུགས་པའི་གཟིམས་ཁང་བདེ་བ་ཅན་ཞེས་བྱ་བ་འདིར།   ཀུན་མཁྱེན་ཆོས་ཀྱི་རྒྱལ་པོས་ཀྱང་ཡུན་རིང་དུ་བཞུགས།   སློབ་དཔོན་ཆེན་པོ་པདྨ་འབྱུང་གནས་མཁའ་འགྲོའི་ཚོགས་དང་བཅས་པ་དང༌།   ཁྲོ་བོའི་རྒྱལ་པོ་རྟ་མགྲིན་དྲེགས་པའི་ཚོགས་ཀྱིས་བསྐོར་བ་ཞལ་གཟིགས།   བདེ་བ་ཅན་གྱི་སྨོན་ལམ་མཛད་པའི་ནུབ་བདེ་བ་ཅན་གྱི་ཞིང་ཁམས་ཀྱི་བཀོད་པ་དངོས་སུ་གཟིགས་ཤིང༌།   མཐོང་གྲོལ་གྱི་སྐུ་འབུམ་ཆེན་པོ་ལ་ལུས་ཀྱི་ལས་དང༌།   རྒྱུ་ནོར་ལོངས་སྤྱོད་ཀྱི་འབྲེལ་བ་ཐོགས་ཚད་རང་གི་སྐལ་པ་དང་འཚམ་པར་སྐྱེ་བ་གཅིག་ནས་བརྩམས་ཏེ།   སྐྱེ་བ་བདུན་ཚུན་ཆད་ལ་ཞིང་ཁམས་རྣམ་དག་བདེ་བ་ཅན་དུ་སྐྱེ་ལ།   ཐེག་ཆེན་ཆོས་ཀྱི་དགའ་སྟོན་ལ་སྤྱོད་པར་འགྱུར་བའི་འཁྲུལ་མེད་ཀྱི་ལྟས་མངོན་སུམདུ་གཟིགས།   །གནས་ཀྱི་མིང་བདེ་བ་ཅན་མཚན་དོན་དང་མཐུན་པ་ལགས།   དེ་དག་གི་གཡོན་ངོས་ཕྱོགས་བློན་པོ་རིན་པོ་ཆེ་ཚོགས་པ་ལྟ་བུའི་བྲག་འདི་ལ།   སྒྲུབ་གནས་དམ་པ་གསང་སྔགས་འཇིགས་མེད་སེང་གེ་རྫོང་ཞེས་བྱ་བ།   ཆོས་རྗེ་ཀུན་སྤངས་ཀུན་ཏུ་བཟང་པོའི་རྣལ་འབྱོར་ཡན་ལག་དྲུག་པ་དང༌།   དཔལ་དུས་ཀྱི་འཁོར་ལོས་བསྟན་པ་སྤེ་བའི་བར་དུ་དགེ་བའི་རྟག་དང་མཚན་མ་བྱུང་པའི་གནས་དེ་ལེགས།    དེའི་འོག་ཏུ་རྟ་ར་གདོང་ཞེས་གྲགས་པ་འདི་ན།   སྤུང་བཀྲ་ཨོ་རྒྱན་པའི་སློབ་མ་ཟླ་སེང་གིས་ཀྱང་ཅུང་ཟད་བཞུགས།   ཀུན་མཁྱེན་ཆོས་ཀྱི་རྒྱལ་པོའི་སློབ་མ།   གྲུབ་ཆེན་རྟ་ར་བ་ཞེས་བྱ་བ།   ལྕེ་ཅུང་གི་བདུད་རྩི་ཁོ་ནས་ཚིམ་སྟེ།   སྐུ་ཚེའི་སྨད་ལོ་ཉི་ཤུ་རྩ་ལྔའི་བར་དུ་མི་ཟས་བཟའ་བཏུང་གཞན་རྣམས་གསོལ་མི་དགོས་པ་ལྟ་ཅི་སྨོས།   མཐའ་ན་ཆུ་སྙི་མ་བ་གང་ཙམ་ཡང་མ་གསོལ་བ།   གང་ན་དང་ན་བཟའ་ལ་སོགས་པའི་སྤྲོས་པ་ཡེ་མི་དགོས་པ་དེས་བཞུགས་ཤིང༌།   དེའི་སྟོད་བྲག་རི་ངོས་གཟར་པོའི་ཕུག་པ་ཆུང་ངུ་ཕལ་གྱིས་བགྲོད་དཀའ་བ་འདིར།   ཀུན་མཁྱེན་ཆོས་ཀྱི་རྒྱལ་པོ་ཉིད་ཀྱི་སློབ་མ་གྲུབ་ཆེན་དབུས་པས་བཞུགས།   གྲུབ་ཐོབ་དེ་ཡང་ཟླ་བ་ཕྱེད་ཙམ་མི་ཟས་ཡེ་གསོལ་མི་དགོས།   ཐུགས་ཉམས་འུར་རེསཀྱི་སྐུ་འབུམ་ཆེན་མོའི་ཕྱི་ངོས་ནསབརྒྱུད་དེ་རྩེ་ལ་ཐལ་བྱུང་དུ་གཤེགས།   ཆར་ཁེབས་ཀྱི་བྲེག་སྲོག་ལ་ཕྱག་ཡ་རེ་ཙམ་ཞབས་ཡ་རེ་ཙམ་བཞག་པའི་ངང་ནས་འཕགས་ཅིང་བསྐོར་བ་ལན་མང་དུ་མཛད།   སླར་བུམ་ལྡེང་ཆེན་མོའི་སྟེང་དུ་འབེབས་ཀྱི་ཚུལ་དུ་རྡོ་རྗེ་སྐྱིལ་ཀྲུངས་ཕབས་པས་ཉམས་སད་འགྲོ་བ་ཞིག་ཡིན་པར་འདུག   རྒྱབ་རིའི་གཡས་ཀྱི་ངོས་ལ་ཆོས་རྗེ་ཡབ་སྲས་ཐམས་ཅད་དག་བླ་མ་མཁའ་སྤྱོད་པ་ལ་སོགས་པ་མཁས་གྲུབ་དཔག་ཏུ་མེད་པའི་བཞུགས་གནས།   མཁའ་སྤྱོད་ཟུང་འཇུག་རྡོ་རྗེའི་རྫོང་ཞེས་བྱ་བ།   ད་ལྟ་འཁྱོག་པོའི་བྲག་ཅེས་ཟེར་བ་ཡང་དབེན་གནས་མཆོག་ངོ་མཚར་ཅན་འདི་བཞུགས།   འདིར་ཆོས་རྗེ་ཀུན་མཁྱེན་ཆེན་པོ་ནས་སྲོག་རྩོལ་གྱི་ཉམས་རྟོགས་རྒྱུད་ནས་བཤད་པ་བཞིན་མཐར་ཕྱིན་པའི་ཚུལ་བསྟན།   དེའིགཡོན་དུ་བྲག་ཕུག་པདྨ་རཱ་ག་དང༌།   གཡས་སུ་ཕག་མོའི་དུར་ཁྲོད་དོ།   །གནས་མཆོག་དམ་པ་འདིར་ལྷོ་ནས་ཤར་གྱི་བར་མདུན་གྱི་རི་ལ།   ཕུ་ན་རྫ་བྱེ་འུར་གྲགས་པ་འདི།   ཆོས་རྗེ་ཀུན་སྤངས་ཆེན་པོ་དང༌།   བྱང་སེམས་ཆེན་པོའི་སློབ་མ་མོ་གྲུབ་པ་ཐོབ་པ་ཞིང་བཙུན་མ་ཡོན་ཏན་མཚོས་བཞུགས་ཤིང༌།   དེ་ནི་འཛིན་པའི་ཉམས་རྟོགས་མཐར་ཕྱིན།   རྩིག་པ་ལ་ཐོགས་མེད་དུ་གཤེགས།   མ་ཟོས་བཀྲེས་མེད་ཟོས་ཀྱང་འཇུ།།   ཐུར་སེལ་མི་འཛག་བདེ་བ་རྒྱས།།   ཞེས་སོགས་ཀྱི་ཡོན་ཏན་མངོན་གྱུར་དུ་མངའ།   ཕུ་ཤར་ནུབ་ཀྱི་རི་རྩེ་ལ་ཕར་འཕུར་ཚུར་འཕུར་མཛད་པར་གྲགས་ཤིང༌།   ལས་སྟོད་པ་དབང་རྒྱལ་གྱིས་ཀྱང་བསྟོད་བསྐུར་ཆེར་མཛད་པ་དེ་ཡིན།   དེ་རྗེས་ཀུན་མཁྱེན་ཆེན་བོས་ཀྱང་ཅུང་ཟད་བཞུགས་ཤིང༌།   ཞལ་སློབ་སྒྲུབ་པ་མོ་ཡེ་ཤེས་རྒྱན་ཞེས་བྱ་བ་མངོན་ཤེས་རྒྱ་ཆེ་ལ་བརྟན་པ་མངའ།   ཕྱི་ནང་བར་གསུམ་འཕྲལ་ཡུན་ཐམས་ཅད་ཐོགས་མེད་དུ་མཁྱེན་པ་ཞིག་དང༌།  སྒྲུབ་པ་མོ་ཞིང་བཙུན་མ་ཆོས་མཚོ་ཞེས་བྱ་བ།   བདག་གཞན་བརྗེ་བའི་བྱང་ཆུབ་ཀྱི་སེམས་མངའ་བ་ནུས་མཐུ་ཆེན་པོས།   དགེ་སློང་བཀྲ་ཤེས་བཟང་པོ་གཤེགས་ལ་ཁད་ཀྱི་དུས་སུ།   དེའི་ཚེའི་ལྷག་མ་ལོ་བདུན་ཁྱེད་ལ་འབུལ།   ཁྱེད་ཀྱི་ཚབ་དུ་ང་འགྲོ་གསུང་ནས་དེ་མ་ཐག་སྙུང་བ་མེད་པར་གཤེགས།   དགེ་སློང་པ་འང་དེ་འཕྲལ་སྙུང་བག་དངས།   ལོ་བདུན་བཞུགས་ཏེ།  དེ་ལྟ་བུའི་གྲུབ་བརྙེས་ངོ་མཚར་ཅན་དེ་རྣམས་ཀྱིས་བཞུགས་པའི་གནས་ལེགས།    འདིའི་གཡོན་ན་གཞོང་སྟོད་ཀྱི་དུར་ཁྲོད་དང༌།   ཤརངོས་ཀྱི་ལུང་པ་ན།   བྲོག་མིའི་སློབ་མ་མོ་གྲུབ་པ་ཐོབ་པ་པྲང་མོ་དཀོན་ནེའི་སྒྲུབ་གནས་རྣམས་བཞུགས་ཤིང༌།   གཞན་ཡང་ཕྱིས་ཐེབས་པ་ལ།   ཀུན་མཁྱེན་ཆོས་ཀྱི་རྒྱལ་པོའི་སློབ་མ་སྒྲུབ་ཆེན་མ་འོད་གསལ་སྐྱིད་ཀྱི་སྒྲུབ་གནས་དང༌།   སྒྲུབ་ཆེན་དབང་མོ་མཚོའི་སྒྲུབ་གནས།   དེང་སང་རྫ་ཤར་ནུབ་ཏུ་གྲགས་པ་གཉིས།   གཞན་ཡང་གླིང་བཞིར་གྲགས་པ།    བདེ་ཆེན་བྱང་ཆུབ་གླིང༌།   འོད་ཟེར་གླིང༌།    ཁྲའུ་གླིང༌།   བསམ་གཏན་གླིང་སྟེ།   གླིང་བཞི་དང༌།   དབུ་རྩེ་གཙུག་ལག་ཁང་དུ་མ་དང་བཅས་བཞུགས་པ་འདི་ལགས།   དེ་དག་ནི་གམས་སྤྱིའི་བཤད་པ་མདོ་ཙམ་ལགས་ཏེ།  

ཕྱོགས་བཅུའི་སངས་རྒྱས་ཀུན་གྱི་ཞིང་ཁམས་འདིར།   །བརྩོན་འགྲུས་ལྡན་པས་རྩེ་གཅིག་འབད་གྱུར་ན།   །མ་དག་རྣམ་སྨིན་ལུས་འདི་གནས་གྱུར་ནས།   ། རྡོ་རྗེའི་སྐུ་མཆོག་ཚེ་འདི་ཉིད་ལ་འགྲུབ།   །བརྩོན་པ་འབྲིང་པོའི་བར་དོར་སངས་རྒྱས་ཞིང༌།   ། བརྩོན་འགྲུས་ཐ་མ་ཡིན་ཀྱང་ལམ་སྣ་ཟིན།   །གནས་མཆོག་འདི་དང་ཆོས་བརྒྱུད་འདི་ཉིད་ལ།   ། དམ་ཚིག་མ་ཉམས་སྡིག་ཆེན་མ་བསགས་ན།   །འབད་རྩོས་མེད་ཀྱང་སྙོམས་ལས་དབང་གྱུར་ཀྱང༌།   ། གནས་འདིར་བསྡད་པ་ཙམ་གྱིས་དགེ་སྦྱོར་སྐྱེ།   ། ས་བཅུའི་བྱང་སེམས་རིགས་ལྡན་སྤྲུལ་པའི་སྐུ།   ། དེ་དག་རྣམས་ཀྱི་བྱིན་རླབས་ངང་གིས་འཇུག   །དད་པ་ཆེན་པོས་ཕྱག་མཆོད་བསྐོར་བ་དང༌།   ། གསོལ་བ་བཏབ་ན་ཡིད་ཆེས་འཕྲལ་འཕྲལ་འབྱུང༌།   །ལན་ཅིག་ནཇལ་བ་འང་བར་ཆད་ཀུན་ཞི་ཞིང༌།   ། ལན་གསུམ་བསྐོར་བས་ངན་འགྲོའི་སྐྱེ་སྒོ་ཁེགས།   །ལན་མང་མཇལ་ན་མཚམས་མེད་བྱས་པ་ཡང༌།  ། རྣམ་པར་དག་ནས་བདེ་ཆེན་གནས་སུ་འགྲོ།   །མཐོང་ཐོས་དྲན་རེག་ཐམས་ཅད་དོན་ལྡན་པའི།  ། གནས་མཆོག་འདི་དང་མཚུངས་པ་འགའ་ཡང་མེད།   །ཟུང་འཇུག་ཡེ་ཤེས་ཆེན་པོའི་ཕོ་བྲང་འདིར།   ། དད་པ་བསྐྱེད་ཅིང་འབྲེལ་བ་འཇོག་པ་རྣམས།   །ཚེ་རིང་ནད་མེད་བདེ་སྐྱིད་ཕུན་སུམ་ཚོགས།  །རྣམ་མཁྱེན་གོ་འཕངས་ཐོབ་པའི་དགེ་ལེགས་འཕེལ།   །ཅེས་དགེ་སློང་ཀུན་དགའ་སྙིང་པོས་བྲིས།   བཀྲ་ཤིས།   དགེ་ལེགས་འཕེལ།     སྲས་བཅས་རྒྱལ་བ་ཀུན་གྱིས་བྱིན་རླབས་པས།   །དངོས་གྲུབ་ཐམས་ཅད་འབད་མེད་འབྱུང་བའི་གནས།   །འདིར་ནི་མཁའ་མཉམ་སེམས་ཅན་དོན་ཕྱིར་དུ།   །བདག་ཀྱང་སྒྲུབ་པའི་རྒྱལ་མཚན་འཛིན་པར་ཤོག    །ཤུ་བྷཾ།

གཉིས་པ་སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་ནི།   གནས་འདི་དུས་གསུམ་གྱི་སངས་རྒྱས་རྣམས་ཀྱིས་བྱིན་གྱིས་བརླབས་ཤིང༌།   སྒོས་སུ་འཕགས་པ་སྤྱན་རས་གཟིགས་ཀྱི་ཞིང་མཆོག་ཏུ་གདོད་ནས་གྲུབ་པ་ཡིན་པ་ལས།   བསྟན་པ་འདི་ལ་མིའི་སྐྱེ་བ་ཉེ་བར་གཟུང་བའི་ཚུལ་བསྟན་པའི་དམ་པ་རྣམས་ཀྱིས་བྱིན་གྱིས་རློབས་ཚུལ་ནི།   སློབདཔོན་ཆེན་པོ་པདྨ་འབྱུང་གནས་ཞེས་བྱ་བ་སྤྲུཔའི་སྐུ་དེ་ཉིད་ཀྱིས།   བརྟན་མ་བཅུ་གཉིས་ཀྱི་གནས་རྣམས་སུ་བྱོན་ཞིང༌།   ཁྱད་པར་ནགས་རྒྱལ་གྱི་རི་ལ་ལན་མང་དུ་ཕེབས་པ་དང༌།   ཡང་དགོས་གནས་འདིར་ཞག་བདུན་བཞུགས་པར་གྲགས་ཤིང༌།   ཕུག་ཆེན་གོང་མ་དང་ཕུག་པ་གོང་འོག་རྣམས་སུ་ཕྱགས་ཕེབས། དེ་རྗེས་སུ་རིག་པ་འཛིན་པའི་སལ་བཞུགས་པ།   སྣུབས་ཆེན་ནམ་མཁའི་སྙིང་པོ་དང༌།   དམ་འབྲེ་ཀླུའི་རྒྱལ་མཚན་དང༌།   སྣ་ནམ་བ་ཚུལ་ཁྲིམས་འབྱུང་གནས་ལ་སོགས་པས་ཀྱང་སྒྲུབ་གནས་སུ་མཛད་ཅིང༌།    བོད་དབུས་གཙང་གི་ཕྱོགས་འདིར་གསང་སྔགས་བརྒྱུད་ཀྱི་བསྟན་པ་དར་བར་མཛད་པ་ལ་ཐོག་མར་བཀའ་དྲིན་ཆེ་བ་སྒྲ་སྒྱུར་གྱི་རྒྱལ་པོ་འབྲོག་མི་ལོ་ཙཱ་པའི་སློབ་མ།   མོ་གྲུབ་པ་ཐོབ་པ་བཞིའི་གཙོ་མོ།   བཟང་སྒོམ་དཀོན་མཆོག་ཞེས་བྱ་བས།   ཐོག་མར་ནགས་རྒྱལ་གྱི་ཤར་མགུལ་དུ་ཅུང་ཟད་བཞུགས༌།   དེ་ནས་གནས་འདིར་བྱོན་ཏེ་ཡུན་རིང་བར་བཞུགས་ཤིང༌།   མམཐར་འཇའ་ལུས་རྡོ་རྗེའི་སྐུ་བརྙེས་པ་ཡིན།   བཞུགས་གནས་ད་ལྟ་ཡང་ཡོད་པ་འདི་ལགས།   དེ་རྗེས་སུ་ལོ་བརྒྱད་ཅུ་སྐོར་སོང་བ་ནམ་ཅིག་སངས་རྒྱས་རི་མས་གནས་འདིར་ཕྱགས་ཕེབས།   ཡུན་རིང་དུ་བཞུགས་ཤིང་བཀའ་གདམས་དང་རྫོག་ཆེན་གྱི་སྒྲུབ་གྲྭ་བསྐྱངས་བར་གདའ།   བཞུགས་གནས་དང་ཆོས་གྲྭ་ད་ལྟ་ཡང་ཡོད་པ་འདི་ལགས།   དེ་ཉིད་ཀྱི་སྒྲུབ་གྲྭ་མ་སྟོངས་པའི་རྒྱུན་ལ།   མི་རིང་བར་དཔལ་ལྡན་གྲུབ་ཐོབ་འདར་ཕྱར་རིན་ཆེན་བཟང་པོ་ཕེབས་ཏེ།   ཐོག་མར་ཚོགས་པ་མ་བསྐྱངས།    སྒྲུབ་པ་ཁོ་ན་མཛད་ཅིང་བཟུགས།   ཕུག་ཆེན་འོག་མར་བདག་མེད་ལྷ་མོ་བཅོ་ལྔ་དང་འཁོར་ལོ་བདེ་མཆོག་སོགས་ཞལ་གཟིགས།   ཕུག་ཆེན་གོང་མར་སློབ་དཔོན་པདྨ་འབྱུང་གནས་དངོས་སུ་ཞལ་མཇལ་ཏེ།   པདྨ་དབང་ཆེན་གྱི་ཆོས་སྐོར་མཐའ་ཡས་པའི་བདག་པོར་བསྐོས།   ནུས་མཐུ་ཐོགས་པ་མེད་ཅིང་བྱིན་རླབས་དང་ཡེ་ཤེས་བསམ་གྱིས་མི་ཁྱབ་པའི་གྲུབ་ཐོབ་རྩོད་མེད་དུ་གྱུར་པ་ཡིན་པར་གདའ།   དེ་སྐབས་གསང་འདུས་རིམ་ལྔ་གཙོ་བོར་གྱུར་པའི་གསར་རྙིང་གཉིས་འདུས་ཀྱི་སྒྲུབ་གྲྭ་མཛད།   གྲུབ་ཐོབ་ཉིད་ཀྱིས་མིའི་བླམ་གཞན་ལ་མགསན་ཡང༌།   སེམས་འགྲེལ་སྐོར་གསུམ་ལ་གཟིགས་ཀྱིན་དོན་ཐུགས་ཉམས་སུ་བཞེས་པས།   སྦྱོར་བ་ཡན་ལག་དྲུག་པའི་ཉམས་རྟོགས་མཐར་ཕྱིན་པ་མངའ་བར་འདུག   དེ་རྗེས་མི་རིང་བར་སྔར་གྱི་སྒྲུབ་གྲའི་རྒྱུན་མ་སྟོངས་པ་ལ།   རིགས་ལྡན་སྤྲུལ་པའི་སྐུ་མཁས་བཙུན་བཟང་པོའི་མཐར་ཐུག་རྟགས་མངོན་གྱུར་གྱི་གྲུབ་ཐོབ་ཆེན་པོ་ཞང་ཀུན་སྤངས་ཐུགས་རྗེས་བརྩོན་འགྲུས།   མཚན་གྱི་ཁྱད་པར་གཞན་ཀུན་སྤངས་ཆེན་པོ་ཀུན་ཏུ་བཟང་པོ་ཞེས་བྱ་བས་ཕེབས་པ་ཡིན་ཏེ།   དེ་ཡང་ཆོས་རྗེ་ཀུན་སྤངས་ཆེན་པོ་དེ་ཉིད།   སེ་མཁར་ཆུང་ན་བཞུགས་པའི་དུས།   གྲུབ་ཐོབ་སེ་སྟོན་ཀུན་རིག་གི་སྐུའི་སྐྱེ་བ་ཡིན་པ་ཡང་ཐུགས་ཀྱིས་དྲན།    གཞི་བདག་རྙིང་པ་རྣམས་ཀྱིས་ཀྱང་ངོ་ཤེས་རྒྱུད་ཀྱི་སྙིང་པོ་མཛད་པའི་ཐོག་མར་དགྱེས་པའི་གཟིགས་ལྟས་ཀྱང་བྱུང༌།   བརྟན་མ་བཅུ་གཉིས་ཀྱི་གཙོ་མོ།   ནགས་སྨན་རྒྱལ་མོས་ཇོ་ནང་དུ་སྤྱན་འདྲེན་པའི་ཞུ་བ་ཡང་ཡང་ཕུལ།   དེ་ལ་ད་ལྟ་དུས་ལ་ཅུང་ཟད་མ་བབ་པས་དརེས་མི་འཚལ།   ལོ་གསུམ་ནས་འོང་ཞེས་ཞལ་གྱིས་བཞེས།   དེ་བར་དུ་ལྷ་ས་ཡེར་བ་སོགས་དབུས་ཕྱོགས་སུ་འགྲོ་དོན་ཆེར་མཛད།   །སྔར་གྱི་ཕྱི་ནང་གི་རྟེན་འབྲེལ་འཛོམ་པ་ལས།   ལོ་གསུམ་གྱི་མཚམས་དེ་ནས་སྤྱི་བྲག་ནགས་གསུམ་གྱི་མཁན་སློབ་དགེ་འདུན་ཐམས་ཅད་མགྲིན་གཅིག་པས་ནན་ཏན་དུ་གསོལ་བ་བཏབ་པ་ལ་བརྟེན་ནས།   གནས་མཆོག་དམ་པར་འདིར་ཕྱགས་ཕེབས།   །དེ་ཙམ་ན་གནས་འདིའི་རྒྱུན་བཞུགས་སྒྲུབ་པ་པོ་སུམ་ཅུ་ཙམ་ཡོད་པར་གྲགས།   །ཐོགས་མ་ལོ་གཅིག་སེང་རྫོང་དུ་བཞུགས།    དེ་ནས་འཁྱོགས་པའི་མཚན་གྱི་གདན་དྲངས།   འཁྱོག་པོར་གཟིམས་ཁང་མཁའ་སྤྱོད་བདེ་ལྡན་དུ།    ཐོག་མཐའ་བར་གསུམ་དུ་དགེ་བའི་མཚན་མ་བརྙེས་ནས་རྒྱུད་ཀྱི་སྙིང་པོ་རྩ་འགྲེལ་ཚར་བར་མཛད།    རྣལ་འབྱོར་ཡན་ལག་དྲུག་པའི་སྙན་རྒྱུད་ཡི་གེར་བཀོད་པའི་ཐོག་མ་འཁྲིད་ཡིག་ཆེན་པོ་ཡང་མཛད།    དེ་རྗེས་སྐུ་ཚེའི་སྨད་ལ་སྒྲུབ་གནས་སྐྱིད་ཕུག་བདེ་ལྡན་དུ་གདན་ཕབ་པར་གདའ།   དེ་སྐབས་ཕྱོགས་བཅུ་ནས་འདུས་པའི་ཆོས་མཛད་སྒྲུབ་པ་ཕོ་མོ་ཚོགས་པ་ཉུང་དུས་ཀྱང་དྲུག་བརྒྱ་རེ་རྟག་ཏུ་འདུས་ཤིང༌།   དེ་ནས་བརྩམས་ཏེ་ད་ལྟའི་བར་དུ་རྒྱུད་ཡམས་ཅད་ཀྱི་ངེས་གསང་ཟབ་ལམ་རྡོ་རྗེ་རྣལ་འབྱོར་ཡན་ལག་དྲུག་པ་གཙོ་བོར་གྱུར་པའི་སྒྲུབ་གྲྭ་རྒྱུན་མ་ཆད་ཅིང༌།   དར་ཞིང་་རྒྱས་པར་གྱུར་པ་ལེགས་ཏེ།   །ཆོས་རྗེ་ཀུན་སྤངས་ཆེན་པོས་གནས་འདིར་ལོ་ཉི་ཤུ་རྩ་གཅིག་ཙམ་བཞུགས།   དེ་ནས་བྱང་སེམས་རྒྱབ་ཡེ་ཤེས་ཀྱིས་ལོ་བརྒྱད།   མཁས་བཙུན་ཡོན་ཏན་རྒྱ་མཚོས་ལོ་བདུན་རྣམས་གདན་ས་མཛཔ་རྣམས་ལ་འང་སྒྲུབ་བརྒྱུད་ཇེ་འཕེལ་ཇེ་འཕེལ་དུ་གྱུར།   དེ་རྗེས་རིགས་ལྡན་སྤྲུལ་སྐུ་ཆེན་པོ།   དུས་གསུམ་སངས་རྒྱས་ཐམས་ཅད་ཀྱི་ངོ་བོ།   མདོ་རྒྱུད་རྒྱ་མཚོའི་གླེགས་བམ་གཅིག་གྱུར།   ངུར་སྨིག་འཛིན་པ་ཀུན་གྱི་ཁྱུ་མཆོག   རྒྱ་ཆེན་བྱང་ཆུབ་སེམས་ཀྱི་མངའ་བདག   མཐའ་བྲལ་ངེས་དོན་བསྟན་པའི་བདག་པོ།   རྟགས་དང་ཡོན་ཏན་མཐའ་དག་མ་སྤས་མངོན་དུ་གྱུར་པའི།   གྲུབ་ཐོབ་ཀྱི་འཁོར་ལོས་བསྒྱུར་པ་ཆེན་པོ།   ཆོས་རྗེ་ཀུན་མཁྱེན་དོལ་པོ་པ་མཚན་བརྗོད་པར་དཀའ་བ་ཤེར་རབ་རྒྱལ་མཚན་དཔལ་བཟང་པོ་དེ་ཉིད་ཀྱིས།   ལོ་བཅོ་ལྔ་འམ་བཅུ་གསུམགྱི་བར་དུ་གདན་སར་བཞུགས་དུས།   སྐབས་དེ་ཉིད་དང་མ་འོངས་པའི་སེམས་ཅན་མཐོང་ཐོས་དྲན་རེག་ཐམས་ཅད་བླ་ན་མེད་པའི་བྱང་ཆུབ་ཀྱི་ས་བོན་གདབ་པའི་ཕྱིར་དུ།   མཐོང་གྲོལ་གྱི་སྐུ་འབུམ་ཆེན་པོ་བཞེངས།    བཤད་སྒྲུབ་མཐའ་དག་གི་སྒོ་ནས་མདོ་རྒྱུད་ཀྱི་བསྟན་པ་སྒོ་ཐམས་ཅད་ནས་རྒྱས་པར་མཛད།   དེ་རྗེས་ཐུགས་སྲས་དམ་པ་སྒྲ་སྒྱུར་ལོ་ཙ་བ་ཆེན་པོ་བློ་གྲོས་དཔལ་བཟང་པོ་རྒྱལ་ཚབ་དུ་མངའ་གསོལ་ནས་ལོ་ངོ་བཅོ་ལྔ་གདན་སར་བཞུགས་པ་དང༌།   དེ་རྗེས་མཁན་ཆེན་ཕྱོགས་ལས་རྣམ་རྒྱལ་གྱིས་ལོ་དྲུག་གདན་ས་མཛད།   དེ་རྗེས་ལོ་གསུམ་ཙམ་ནས་མཁས་གྲུབ་དཀོན་མཆོག་རྒྱལ་མཚན་གདན་སར་མངའ་གསོལ་མཛད་དེ།   དེ་རྣམས་ཀྱི་རིང་ལ་ཡང་ཀུན་མཁྱེན་ཆོས་ཀྱི་རྒྱལ་པོ་ཉིད་གནས་མཆོག་དམ་པ་འདི་ཉིད་དུ་བཤད་སྒྲུབ་ཀྱི་རྒྱལ་མཚན་འཛིན་པ་དང༌།   ཕྱོགས་བཞིའི་རི་ཁྲོད་སྣ་ཚོགས་སུ་སྒྲུབ་བརྒྱུད་ཀྱི་བསྟན་པ་སྤེལ་བ་དང༌།   ཆོས་སྡེ་དང་གྲྭ་བ་ཐ་དད་པ་རྣམས་སུ་ཆོས་ཀྱི་འཁོར་ལོ་མཐའ་ཡས་པ་བསྐོར་བར་མཛད།   དེ་ལྟར་ཀུན་མཁྱེན་ཆེན་པོ་འདིའི་སྐུ་ཐོག་ལ་ཚོགས་པ་ཉུང་དུས་སུ་ཡང་སྟོང་ཕྲག་གཉིས་རེ་འཚོགས།   མང་བ་ལ་ཚོད་བཟུང་དུ་མེད།   ནམ་ཞག་རྒྱུན་དུ་འདག་སྦྱར་མཚམས་བཅད་པ་རང་ཡང་སྟོང་ཕྲག་རེ་མི་འཆད་པ་འབྱུང༌།   གནས་འདིར་འཚོགས་ཕྱིན་དགེ་སྦྱོར་གྱི་སྣེ་མི་ཟིན་པ་ཡེ་མི་ཡོང༌།   སེམས་འབྲེལ་སྐོར་གསུམ་དང༌།   བྱམས་ཆོས་སྡེ་ལྔ་དང༌།   བསླབ་བསྡུས་སྤྱོད་འཇུག་སོགས་གཞུང་ལུགས་ཀྱི་འཆད་ཉན་དང༌།   དབང་སྒྲུབ་མཆོད་ལག་ལེན་མན་ངག་སྒོ་ཐམས་ཅད་ནས་སྤེལ་བས།   བཤད་ཉན་གྱི་ཟུར་ཆོས་པ་ཡང་ལྔ་བཅུ་ཙམ་རེ་རྟག་ཏུ་བཞུགས།   མདོར་ན་ངེས་དོན་གྱི་བསྟན་པ་ནམ་ལངས་བ་དང་ཉི་མ་ཤར་བ་བཞིན་དུ་གྱུར་པས།   སྔོན་ཆོས་རྗེ་ཀུན་སྤང་ཆེན་པོས་གནས་འདིར་ཕ་ལས་བུ་ལྷག   བུ་ལས་ཚ་ལྷག   ཚ་ལས་ཡང་ཚ་ལྷག་པ་འབྱུང་ཞེས་དང༌།   ད་ལྟ་བཟང་ལྡན་བར་མར་ཆོས་འཆད།   མ་འོངས་པ་ན་མཆོད་རྟེན་བཞེངས་ཅེས་ལུང་བསྟན་པ་ཐོག་ཏུ་བབ་པ་དེར་གདའ།   དེ་ནས་སླར་ཡང་མཁན་ཆེན་ཕྱོགས་ལས་རྣམ་རྒྱལ་གྱིས་ལོ་བཅོ་ལྔའི་བར་གདན་ས་མཛད་པ་དང༌།   དེ་རྗེས་རི་མ་ཅན་དུ་ཀུན་མཁྱེན་བྱང་ཆུབ་སེང་གེ   མཁས་མཆོག་ཉ་དབོན་ཆེན་པོ་ཀུན་དགའ་དཔལ།   མཁན་ཆེན་རྒྱལ་བ་ཇོ་བཟང༌།    རྒྱལ་སྲས་ཆོས་དཔལ་མགོན་པོ།   འདྲེན་མཆོག་ཤེས་རབ་བཟང་པོ།   འཇམ་དབྱངས་དཀོན་མཆོག་བཟང་པོ།   མཁས་བཙུན་ཆོས་དཔལ་བཟང་པོ།   འཇིམས་ཆེན་དཀོན་མཆོག་རྒྱལ་མཚན།  འཇིམས་ཆེན་བསོད་ནམས་རྒྱལ་མཚན།   རྒྱལ་བ་ནམ་མཁའ་ཆོས་སྐྱོང་སྟེ།   དེ་ཡན་ཆད་མདོ་སྔགས་མཐའ་དག་དཔལ་ཇོ་ནང་བ་ཁོ་ནའི་དཀའ་སྲོལ་འདྲེས་མེད་ཁོ་ན་ཡིན་ཅིང༌།   གདན་རབས་དེ་ཐམས་ཅད་རིགས་ལྡན་གྱི་སྤྲུལ་པའི་སྐུ་ཡིན་པར་གྲགས་སོ།   །དེ་རྗེས་ཀྱང་གདན་རབས་སུ་བྱོན་པ་ཐམས་ཅད་མཁས་བཙུན་བཟང་པོ་ཤ་སྟག་བྱོན་པ་ལེགས་ཏེ།   འདྲེན་མཆོག་ནམ་མཁའི་མཚན་ཅན་གྱིས་རྗེས་སུ།   བྱང་སེམས་དཔལ་ལྡན་རིན་ཆེན།   མཚུངས་མེད་ཆོས་སྐྱོང་རྒྱལ་མཚན།   སྒོ་རུམ་ཀུན་དགའ་ལེགས་པ།   བསྟན་འཛིན་ནམ་མཁའ་བཟང་པོ།   མཁས་པ་རིན་ཆེན་བཀྲ་ཤིས།   རྗེ་བཙུན་ཀུན་དགའ་གྲོལ་མཆོག   བསྟན་འཛིན་ཀུན་དགའ་དཔལ་བཟང་རྣམས་བྱོན།  དེ་རྗེས་ད་ལྟའི་བླ་མ་དམ་པའོ།   །གཞན་ཡང་གནས་འདིར་རི་ཁྲོད་སོ་སོའི་སྒྲུབ་གནས་སྐྱོང་བའི་སྒྲུབ་པ་མོ་དང་སྒྲུབ་ཆེན་གྲུབ་བརྙེས་མང་པོ་དང༌།   ཟུར་ཆོས་ཀྱི་སློབ་དཔོན་དང༌།   རྡོར་འཛིན་མཛད་པ་སོགས་མཁས་གྲུབ་དུ་མ་ཞིག་བྱོན་པ་ལགས་ན་འང༌།   མཐའ་ཡས་པར་བརྗོད་ཀྱི་ག་ལ་ལང༌།   སྐབས་འདི་དག་ཏུ་སྤྲོ་ན།   ཆོས་རྗེ་ཡབ་སྲས་ལ་སོགས་པ་བླ་མ་རྣམས་ཀྱི་ཆེ་བ་བརྗོད།   རྣམ་ཐར་རྒྱས་བསྡུས་རྣམས་ནས་ཅི་རིག་པར་བླངས་འཚམ་པར་བཤད་དོ།   །

དང་པོ་ས་ལ་རང་བཞིན་གྱིས་གྲུབ་པའི་ཡོན་ཏན་ནི།   གངས་ཅན་མནྡྷ་ར་དང་ལྷུན་པོ་སོགས།   །ལྷ་དང་དྲང་སྲོང་རིག་འཛིན་བགྲང་ཡས་ཀྱིས།   །ཉེ་བར་བསྟན་པའི་རི་ཡི་རྒྱལ་པོ་རྣམས།   །ཕྱོགས་འདིར་གཅིག་ཏུ་འདུས་པ་ལྟ་བུར་ཡོད།   །ཕུགས་བཞིའི་རི་རྣམས་རྩེ་མོ་ཤིན་ཏུ་མཐོ།   །རྩ་བ་བརྟན་ཅིང་དབྱིབས་ལེགས་ལྷུན་སྡུག་ཆགས།   །ངོས་རྣམས་སྨན་ལྗོངས་ཉམས་དགའ་ཡངས་པ་དང༌།   །ཟླ་བ་ཆུ་ཤེལ་ཨིན་དྲ་ནཱི་ལ་སོགས།   །ནོར་བུའི་ཕུང་པོ་བརྩེགས་འདྲའི་བྲག་རི་མཛེས།   །རི་བོའི་སུལ་རྣམས་ནགས་ཚལ་སྣ་ཚོགས་དང༌།   །ལྗོན་ཤིང་དུ་མས་རྣམ་པར་བརྒྱན་པ་ཡོད།   །ཟླ་བ་དྲུག་ཏུ་མེ་ཏོག་སྣ་ཚོགས་བཀྲ།   །བཞི་བརྒྱ་རྩ་བཞིའི་ནད་ཀུན་སེལ་བྱེད་པ།   །སྨན་མཆོག་རྣམ་པ་སྣ་ཚོགས་དུ་མ་ཡི།   ། དྲི་ཞིམ་ངད་ཀྱིས་ཕྱོགས་ཀུན་ཁྱབ་པ་དང༌།   །རྣམ་པ་སྣ་ཚོགས་འབྲས་བུ་ཆགས་པ་ནི།   །འཆི་མེད་དབང་པོ་མཆོད་སྦྱིན་བརྒྱ་པ་འམ།   །མི་འམ་ཅི་ཡི་རྒྱལ་པོ་ལྗོན་པ་ནི།   །འཁོར་བཅས་རོལ་ཞིང་རྩེ་བའི་སྐྱེད་ཚལ་འདྲ།   །རི་བོའི་མགུལ་ནས་ཆར་སྤྲིན་གསར་པ་འཁྲིགས།   །བདུད་རྩིའི་ཆར་ཟིམ་རྒྱུན་མི་འཆད་པར་འབབ།   །མཐོང་བས་ཡིད་འཕྲོག་ཐོས་ན་ཉམས་དགའ་ཞིང༌།   །བསྡད་པ་ཙམ་གྱིས་ཏིང་འཛིན་ངང་གིས་སྐྱེ།།   ཀླུ་ཡི་རྒྱལ་པོ་རྒྱ་མཚོའི་རྩེ་ས་འདྲ།   །འབབ་ཆུ་སྣ་ཚོགས་ལྷུང་ལྷུང་སྒྲ་འབྱིན་ཅིང༌།   །རི་དྭགས་དུ་མ་བག་ཕབ་བདེ་བར་རྒྱུ།   །འདབ་ཆགས་སྣ་ཚོགས་སྙན་པའི་ཅ་ཅོ་སྒྲོག   །རྟ་བདུན་རྒྱལ་པོ་ལྷོ་ཡི་ཁྱིམ་གནས་པའི།   །ཟླ་བ་དྲུག་ཏུ་རི་དང་རི་བོའི་སུལ།   །རི་དྲུང་རི་ཡི་ཤོད་ཀྱི་ངོགས་རྣམས་སུ།   །རྨད་བྱུང་ཡ་མཚན་ཁ་དོག་སྣ་ཚོགས་འཆར།   །སྔོན་ནི་གསེར་དང་བྱི་རུའི་འཕྲེང་བ་སྤེལ།   །དགུན་དུས་རི་དབང་རྒྱས་པའི་རྩེ་མོ་རྣམས།   །བཅོ་ལྔའི་ཟླ་བ་ཉ་རྒྱས་ལྟ་བུར་འགྱུར།   །ཡན་ལག་བརྒྱད་ལྡན་འབབ་ཆུ་དུ་མ་ཅན།   །རི་མཐོ་ས་གཙང་རིག་པ་ཤིན་ཏུ་དངས།   ། ལུ་ཧི་ཏ་ཞེས་ཆུ་ཀླུང་ཚངས་པའི་བུ།   །འབབ་ཆུའི་རྒྱལ་པོ་བྱང་གི་ཕྱོགས་སུ་རྒྱུ།   །རྒྱལ་བའི་ཞལ་མཐོང་གྲུབ་པའི་དམ་ལ་གནས།   །་འདྲེན་པའི་བསྟན་པ་གཅེས་པར་སྐྱོང་བ་ཡི།   །ལྷ་མོ་མཐུ་ལྡན་ནག་སྨན་རྒྱལ་མོ་ནི།   །ལྷ་སྨན་འབུམ་གྱི་ཚོགས་དང་ལྷན་ཅིག་ཏུ།   །དགའ་བས་རོལ་ཞིང་ལྷ་སྲིན་སྡེ་བརྒྱད་ལ།   །དབང་བསྒྱུར་རྫུ་འཕྲུལ་ཆེན་པོས་སྐྱོང་བའི་གནས།   །རི་རྒྱལ་འདི་ཡི་རི་འདབས་ཁོར་ཡུག་ན།   །གྲུབ་པའི་གནས་དང་ལྷཁང་གཙུག་ལག་ཁང༌།   །ཆོས་གྲྭ་བརྒྱ་ཕྲག་དུ་མས་བསྐོར་ཏེ་གནས།   །དེ་ལས་ཁྱད་པར་གནས་མཆོག་དམ་པ་འདི།   །ས་གཞི་ཨེ་ཡིག་ཆོས་ཀྱི་འབྱུང་གནས་འདྲ།   །མཁའ་ལ་རང་བྱུང་འཁོར་ལོ་རྩིབས་བརྒྱད་དབྱིབས།   །རི་རྣམས་པདྨ་འདབ་མརྒྱས་པ་འདྲ།   །ནུབ་བྱང་དཔལ་གྱི་རི་བོ་སྡོ་འབོར་སྐྱོང༌།   །མཐོ་ཞིང་བརྗིད་ཆགས་རི་རྒྱུད་དུ་མས་བསྐོར།   །ཕྱི་རོལ་རྒྱལ་ཁམས་གཞན་ནས་བལྟས་པའི་ཚེ།   །ས་ལས་རྡོ་རྗེ་རྩེ་ལྔ་ལྟ་བུར་འཕགས།   །གནས་འདི་འི་ནང་གི་གང་ནས་བལྟས་གྱུར་ཀྱང༌།   །འཁོར་ལོས་བསྒྱུར་རྒྱལ་གདན་ལ་བཞུགས་པ་འདྲ།   །བྱང་ཤར་ཕྱོགས་ན་རྟ་མཆོག་རིན་ཆེན་དང༌།   །དེ་འི་དྲུང་ན་དམག་དཔོན་རིན་པོ་ཆེ།   །དཔའ་བོའི་ཚོགས་ཀྱིས་བསྐོར་བ་འདྲ་བ་ཡོད།   །བྱང་གི་ཕྱོགས་ན་ཉེ་བར་བརྟེན་པ་ནི།   །བྲག་རིའི་འཕྲེང་བ་འཁོར་ལོ་རིན་ཆེན་འདྲ།   །དེ་འོག་ཡང་རྫོང་ཞེས་གྲགས་བྲག་རི་ནི།   །བློན་པོ་རིན་ཆེན་གཙོ་ལ་གུས་པས་འདུད།   །ནོར་བུ་རིན་ཆེན་འདྲ་བའི་བྲག་རི་ནི།   །ནུབ་བྱང་ཕྱོགས་གནས་རི་དེའི་ངོས་ལ་ནི།   །འདབ་ཆགས་དབང་པོ་དུམ་དགའ་བའི་རོལ།   །གྲུབ་པའི་གནས་མཆོག་དུ་མས་བརྒྱན་པ་ཡོད།   །ལྷོ་ཡི་ཕྱོགས་ན་ཡིད་འོང་རི་ཡི་དབྱིབས།   །བཙུན་མོ་རིན་ཆེན་མངོན་དུ་ཕྱོགས་པ་འདྲ།   །ནུབ་ཕྱོགས་ར་ནི་གླང་་ཆེན་ཉལ་བ་བཞིན།   །མདུན་རི་ལྷུན་ཆགས་སྨན་ལྗོངས་རྒྱས་པ་ནི།   །འབྲུ་ཡིཕུང་པོ་ལྟ་བུར་དབྱིབས་ལེགས་ཤིང༌།   །གནོད་སྦྱིན་དབང་པོ་གཏེར་གྱི་བདག་པོའི་གཙོ།   །འཕགས་པ་ཛམ་བྷ་ལཡི་དབྱིབས་སུ་ཡོད།   །ཕུ་ནི་གཟེང་མཐོ་ལྕགས་རི་ལྟ་བུས་བསྐོར།   །མདའ་ནི་མ་ཤོར་ཕྱག་རྒྱ་ལྟ་བུར་བསྣོལ།   །ཤར་རིའི་ངོས་ལ་བཀྲ་ཤིས་དཔལ་བེ་དང༌།   །གནས་ལུགས་མཚོན་པ་ཨ་ཡིག་གསལ་བར་དོད།   །གཡོན་ཕྱོགས་དངུལ་གྱི་ཕྱེ་མས་གཡོགས་འདྲ་བའི།   །རི་པོ་དར་ཡོལ་ལྟ་བུས་མཛེས་པར་བྱས།   །དོན་དམ་ཨེ་ལ་ཝཾ་ཡིག་བཞུགས་པ་ལྟར།   །གནས་ཀྱི་ལྟེ་བར་མཐོང་གྲོལ་ཆེན་པོ་ནི།   །ཕྱོགས་བཅུ་དུས་གསུམ་བཞུགས་པའི་སངས་རྒྱས་དང༌།   །བྱང་ཆུབ་སེམས་དཔའ་ཀུན་གྱི་ངོ་བོ་ཉིད།   །མཐོང་ཐོས་དྲན་རེག་འབྲེལ་ཚད་དོན་ལྡན་ནི།   །རྨང་ནི་ས་གཞི་ལྟ་བུར་རྒྱ་ཆེ་ཞིང༌།   །རྩེ་མོ་སྐྱེ་མེད་གནས་ལ་རེག་པ་སྙམ།   །དཀོད་ལེགས་རྣམ་པར་རྒྱལ་བའི་ཁང་བཟང་འདྲ།   །སངས་རྒྱས་རྣམ་པར་སྣང་མཛད་བཞུགས་པའི་གནས།   །གཞི་དང་སྙིང་པོ་མེ་ཏོག་གིས་བརྒྱན་པ།   །རབ་འབྱམས་རྒྱ་མཚོ་ཞེས་བྱའི་ཞིང་ཁམས་དང༌།   །འོད་དཔག་མེད་ཀྱི་གནས་མཆོག་བདེ་བ་ཅན།   །མི་འཁྲུགས་ཞིང་ཁམས་མངོན་དགའ་ལ་སོགས་དང༌།   །འདོད་པའི་ཁམས་ཀྱི་མཆོག་རབ་དགའ་ལྡན་དང༌།   །གཟུགས་ཁམས་རྩེ་མོ་དབང་ཕྱུག་ཆེན་པོའི་ཞིང༌།   །མཁའ་ཁྱབ་འོག་མིན་སྟུག་པོ་བཀོད་པ་སོགས།   །ཀུན་འདུས་བདག་ཉིད་མཆོད་རྟེན་དཔལ་ཡོན་ཅན།   །སྐུ་གཟུགས་གཞལ་དུ་མེད་པས་གང་བ་བཞུགས།   །མཐའ་སྐོར་ཁོ་ར་ཁོར་ཡུག་ཕྱོགས་ཀུན་ཏུ།   ། གཙུག་ལག་ཁང་དང་སྒྲུབ་གནས་བགྲང་ཡས་ཡོད།   །དབུས་ནི་ཧེ་རུ་ཀ་དཔལ་དུས་འཁོར་སོགས།   །འཁོར་ལོའི་དབང་ཕྱུག་རྣམས་ཀྱི་དཀྱིལ་འཁོར་དང༌།   །ཕྱི་རོལ་ཕྱོགས་མཚམས་དུར་ཁྲོད་ཆེན་པོ་བརྒྱད།   །དྲོ་རྗེ་ཅན་གྱི་དཀྱིལ་འཁོར་ཟབ་མོ་དང༌།   རྒྱ་ཆེའི་དཀྱིལ་འཁོར་ངོ་མཚར་རྨད་དུ་བྱུང༌།   ། གནས་མཆོག་དམ་པ་འདིར་ནི་སུ་བསྡ་ཀྱང༌།   །ཆགས་སྡང་ལ་སོགས་ཉོན་མོངས་ངང་གིས་སངས།  ། དགེ་བའི་ཆོས་རྣམས་གོང་ནས་གོང་དུ་འཕེལ།   །གཉིད་རྨུགས་སལ་ཞིང་རིགས་པ་དངས་པའི་གནས།   །ཞེན་ཆགས་སེལ་ཞིང་ངེས་འབྱུང་འཕེལ་བའི་གནས།   །གནོད་སེམས་འབྲི་ཞིང་སྙིང་རྗེ་རྒྱས་པའི་གནས།   །རྣམ་གཡེངས་སྤངས་ཞིང་ཞི་གནས་བརྟན་པའི་གནས།   །ལོག་རྟོག་མི་འབྱུང་ལྷག་མཐོང་ངང་གིས་སྐྱེས།   །གནས་མཆོག་འདི་དང་མཚུངས་པ་གཞན་ཡོད་མིན།   །ཕྱོགས་འཛིན་ཅན་གྱིས་བསྔགས་པ་བརྗོད་པ་དང༌།   །ཐེ་རང་འགོང་པོས་གྲགས་པ་བསྒྲགས་པ་དང༌།   །དབང་སྡུད་ནོར་སྒྲུབ་ལ་སོགས་རྟེན་འབྲེལ་ཀྱིས།   །འདུ་འཚོགས་ཅན་དང་གྲགས་པ་ཆེ་བ་འགར།   །རྨོངས་པའི་འགྲོ་རྣམས་ཆུ་ལྟར་རྒྱུག་པ་ལ།   །ཞིང་མཆོག་དམ་པར་འཁྲུལ་དང་འདི་མི་མཚུངས།   ། གཞན་དུ་ལོ་དང་ཟླ་བར་བསྒོམས་པ་བས།   །གནས་མཆོག་འདིར་ནི་ཞག་དང་ཟ་མ་ཙམ།   །བསྒོམས་པའི་ཕན་ཡོན་ལྷག་པར་ཆེ་བ་ཡིན།   །གཞན་དུ་དགེ་སྦྱོར་འབད་དེ་བསྒོམས་པ་བས།   །སྡིག་ལས་སྤངས་ཆོས་དང་བླ་མ་ལ།   །མོས་གུས་བྱས་ནས་གནས་འདིར་ཉལ་བ་ཡང༌།   །བླ་མེད་བྱང་ཆུབ་་མཆོག་ལ་ཉེ་བ་ཡིན།   །ཉ་པ་གདོལ་པ་རི་དྭགས་རྔོན་པ་དང༌།   །མཚམས་མེད་བྱེད་པ་ལ་སོགས་སྡིག་ཅན་ཡང༌།   །གནས་འདི་བསྐོར་ཞིང་སྒྲུབ་ཆུ་འཐུང་པ་དང༌།   །ཁྲུས་བྱས་ཕྱག་དང་སྐོར་བས་མཆོད་པ་ཕུལ།   །དེ་ཡིས་སྡིག་པ་དག་ནས་ལྷ་ཡུལ་སྐྱེས།   །སྐྱེ་བོ་གཞན་དག་སྨོས་ཀྱང་ཅི་ཞིག་དགོས།   །གནས་མཆོག་འདི་ནི་མཐོང་བ་དོན་ལྡན་ཡིན།   །དེ་ལྟར་ན་མཚན་ཉིད་ཕུན་སུམ་ཚོགས་པ་དང་ལྡན་པའི་གནས་མཆོག་འདི་ནི།   །རྒྱལ་བ་ཤཱཀྱ་སེང་གེ་ལ་སོགས་པ་སྔར་བྱོན་པའི་སངས་རྒྱས་ཐམས་ཅདཀྱིས་བྱིན་གྱིས་བརླབས།   །འཕགས་པ་སྤྱན་རས་གཟིགས་ཀྱི་བཞུགས་གནས་སུ་སྩལ་བ་ལགས།   །

 ༄༅།   ཨོཾ་སྭ་སྟི།   །རྡོ་རྗེ་འཆང་དབང་དཔལ་ལྡན་དུས་འཁོར་དང༌།   །

ཟླ་བཟང་འཇམ་དཔལ་གྲགས་པ་པད་དཀར་སོགས།   །

ཆོས་རྒྱལ་རིག་ལྡན་སྤྲུལ་པའི་སྐུ་རྣམས་དང༌།   །

དུས་འཁོར་ཞབས་དང་ཟླ་བ་མགོན་པོ་དང༌།   །

རིགས་ལྡན་རྣམ་འཕྲུལ་ཆོས་རྗེ་ཡབ་སྲས་སོགས།   །

རྩ་བརྒྱུད་བླ་མ་རྣམས་ལ་གུས་པའི་འདུད།   །

བདག་ཅག་འདིར་ཚོགས་སྐལ་ལྡན་གདུལ་བྱ་ལ།   །

མཆོག་དང་ཐུན་མོངས་དངོས་གྲུབ་སྩ་དུ་གསོལ།   །

འདིར་ཞིང་ཁམས་མཆོག་ཏུ་གྱུར་པ་མི་མཇེད་འཇིག་རྟེན་གྱི་ཁམས།   གླིང་ཁྱད་པར་ཅན་བདུན་པ་ལས་ཀྱི་ས།   དུམ་བུ་བླ་ན་མེད་པ་འཛམ་གླིང་ལྷོའི་ཕྱོགས།  རྒྱལ་ཁམས་ངོ་མཚར་ཅན་བུ་རྒྱལ་བོད་ཀྱི་ཡུལ།   དུས་གསུམ་རྒྱལ་བ་ཀུན་གྱི་ཞིང་ཁམས།   རྒྱལ་སྲས་བྱང་སེམས་ཀུན་གྱི་མཛད་པའི་སྤྱོད་ཡུལ།   གསང་སྔགས་འཛིན་པ་ཀུན་གྱི་གནས་མཆོག་དམ་པ།   གངས་ཅན་ལྗོངས་འདིའི་ལྟེ་བ་སའི་ཐིག་ལེ།རི་བོ་སྟོང་ཕྲག་དུ་མའི་དབུས་ན་མངོན་པར་འཕགས་པ།   ས་འཛིན་དབང་པོ་ནགས་རྒྱལ་དཔལ་གྱི་རི།   རུ་ལག་གཡས་རུའི་སོ་མཚམས།   ཕྱི་ལྟར་ན་སངས་རྒྱས་ཀུན་གྱི་ཟབ་མོའི་ཆོས་སྒྲ་སྒྲོགས་པའི་གནས་བྱ་རྒོད་ཕུང་པོའི་རི།   ནང་ལྟར་ན་འཕགས་པ་སྤྱན་རས་གཟིགས་ཀྱི་ཕོ་བྲང་དམ་པ་རི་བོ་པོ་ཊ་ལ།   གསང་བ་ལྟར་ན་རྡོ་རྗེ་ཐེག་པའི་ངེས་གསང་འབྱུང་ཞིང་དར་བའི་གནས་བྱང་ཕྱོགས་ཤམ་བྷ་ལ།   དེ་ཁོ་མ་ཉིད་ལྟར་ན་དཔལ་ལྡན་འབྲས་སྤུང་ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་དོན་དམ་ཡེ་ཤེས་སངས་རྒྱས་སེང་གེའི་ཁྲིར་བཞུགས་ཨེ་ཝཾ་ཟུང་འཇུག་གི་ངོ་བོ།   སྒྲུབ་གནས་བྱེ་བ་ཕྲག་བརྒྱའི་དབུས་ན།   ལྷུན་པོ་ལྟར་མངོན་པར་མཐོ་བའི་ཞིང༌།   གྲགས་པ་ཉི་ཟླ་ལྟར་གསལ་བ།   རི་ཁྲོད་ཆེན་པོ་ཇོ་ནང་ཞེས་ཡོངས་སུ་གྲགས་པ་འདིའི་གནས་ཀྱི་ཆེ་བའི་དབང་དུ་བྱས་ན།  

ས་གཞི་ལ་རང་བཞིན་གྱིས་གྲུབ་པའི་ཡོན་ཏན་དང༌།   སྐྱེས་བུ་དམ་པ་རྣམས་ཀྱིས་བྱིན་གྱིས་བརླབས་པའི་ཆེ་བ་དང༌།   སྒྲུབ་བརྒྱུད་ཆུ་བོའི་གཞུང་ལྟར་རྒྱུན་མཆད་ཅིང་དར་བའི་གཟི་བརྗིད་དཔལ་དང་ལྡན་པའོ།།